#تجربه وجع وصبر...
انا متجوزه والحمدلله ربنا رزقني بحمزه قره عينى ولما ولدت اكتشفت أنه من ذو قدرات خاصه ورضيت بقضاء الله الحمدلله على كل حال كنت كل يوم بيه ف المستشفيات كان عنده مشاكل كتير وعيوب خلقيه كتير ومع الوقت حبيته جدا حبيته اكتر من نفسى برغم أنه كمان كان كفيف بس كنت مبسوطه بيه جدااااااا وف يوم رجله اتنفخت لوحدها روحت وكشفت وعملتله تحاليل والدكتور قال لازم يتحجز وبرغم انى حامل فمكنش ينفع أنى اتحجز بيه المهم عمت جوزى الله يباركلها قالت هى ال هتتحجز بيه وكنت شايله هم أنى مش هقدر اشوفه ف فتره العلاج....
وجهزتله الشنطه بتاعته بحجاته وجوزى حط ايده على راس حمزه وانا مسكت ايده وقريناله الاذكار ...
جت الساعه اربعه الفجر حسيت بيه أنه تعبان وبيتشنج فضلت اطبطب عليه ونمت...جت الساعه ٨ الصبح صحيت عشان نروح المستشفى وانا قلبى بيتقطع أنى هسيبه الكام يوم دول وكانت الصدمة...
ببص وف وشه لقيت عينه مفتوحه وبوقه مفتوح وبيطلع حاجات من بوقه وجسمه متلج فضلت اصحى فيه مش بيصحا....مش بيصحا عشان مات
حمزه مات واخد روحى وقلبى معاه
انا بحمد ربنا الحمدلله لأنه كان فعلا تعبان
هو ارتاح...بس انا ال مش مرتاحه انا ال بموت كل يوم
كنت شايله هم أنى مش هشوفه كام يوم بس
بس دلوقتي مش هشوفه خاااااااااالص
ارجو منكم الدعاء لي بالصبر لانى حاسه بنار ف قلبى
ليست هناك تعليقات:
إرسال تعليق