عزيزى عقلى

عزيزي عقلي: ارحمني كفايه رغي بقي عندي شغل الصبح ومش
عارف انام منك…الكلام موجه ليك انت كمان يا عم ياللي قاعد فى الحتة الشمال
…جو (( الندابه )) اللي انت فيه ده مابياكولش معايا
لا إما والله اعلن حالة الطوارئ وخليهم يقبضوا عليك بتهمة حيازة مشاعر !….
ياريت هدوء بقي لو سمحتوا انتوا الاتنين عشان نفسي انام ساعه بقي علي بعضها. 
اذا شاء القدر واسعدك الحظ للدخول الي دماغي فاهلاً وسهلا بيك فى اي وقت
ولكن ارجوا اتخاذ الاحتياطات الاتيه:
1- النور مقطوع بقالوا فتره انصحك باتخاذ كشاف اوعلي اقل التقدير شمعه او ولاعه
2- نظرا لكثرة الدهاليز والسراديب الموجوده بالداخل انصحك باتخاذ خريطة ثلاثية الابعاد لتفادي اي توهان ممكن يحصلك….استئذنك تجيب معاك عدد 2 خريطة من نفس النوع لاسباب ساذكرها لاحقا
3- احتمال تقابل جوا ناس كتير ناس معروفة وناس مش معروفه ناس بقالها فتره مش عارفه تخرج او مش عايزه تخرج او ضيعت الخريطة عمداعشان ماتخرجش او ناس انا غيرت مكان الباب مخصوص عشان ماتخرجش لاتقلق اذا التزمت
!! بالتعليمات احتمال كبير انك تلاقي الباب تاني
4- فى شخص عزيز عليا مميز اوي انت هتعرفه لوحدك من غير ما اقولك….الشخص ده تقريبا “انا” هتلاقيه قاعد مع نفسه مد ايدك وسلم عليه واديله الخريطة “فقره 2” لان انا نسيت اقولك ان انا من ضم الناس اللي نفسها تخرج اصلا
5- كما ذكرت لك سابقا ان المكان ملئ بالظلام الدامس فاحتمال كبير جدا تلاقي كائنات غريبة غير معلومه المصدر “ماتقلقش بتحصل في اي دماغ” بس لازم انبهك ان معظمها من النوع الشرس فانصحك باتخاذ بازوكة او رشاش ألي للتخلص منهم فور ظهورهم وتبقي ريحت نفسك وريحتني !!
6- فى نهاية الكلام اتمنالك رحله سعيده…ده اذا خرجت اصلا !!”