ليه اتنين بيحبوا بعض ميتجوزوش بعض عشان السيد الوالد عايز الشقة تبقى عشرتلاف اوضة وريسيبشن و خمستاشر حمام؟
اسئلة كتير غريبة كده بقعد افكر فيها ومبلاقيش اجابة مقنعة .. انا عارف ان انا بتكلم وانا مش جوا الموضوع وعارف ان دايما الاب والام عايزين ولادهم يعيشوا حياة افضل .. بس لو اتكلمنا بعقلانية شوية هو شاب عنده 27 سنة هيجيب 300 الف جنيه يجيب بيهم شقة منين؟ .. طب هو ايه اصلا الازمة ف انه يبدأ حياته مع مراته - اللى راضيه بحاله - ف شقة ايجار وبعدين ربنا يسهل .. ونحط تحت كلمة اللى راضية سبعين الف خط .. اغلب الجوازات بتبقى البنت راضية بحال المتقدم ليها لكن الاب والام مش راضيين وبيطلعوا فى الواد عيوب الدنيا .. شاب عنده 27 سنة هيبقى عنده عربية منين؟ قولى سبب واحد مقنع يخليه يستلف من طوب الارض عشان سعادتك عايز الفرح ف فندق 600 نجمة .. هاتلى سبب مقنع انه بعد اسبوع من جوازه يبدأ يطلع عين امه ويشيل الهم ف ازاى هيسدد ديونه .. هاتلى سبب واحد مقنع ف ان قرايبك يبقوا راضيين عن العريس! هم مال ابوهم يا عم .. الحياة اصلا صعبة انتوا ليه بتصعبوها اكتر على الناس! ليه بتبوظ جوازه بنتك عشان أوضه عايز الواد يجيبها وهو معهوش .. ليه بتكره البنت فيه وتقنعها انه هيعيشها ف جحيم .. ليه لازم بنتك تعيش ف نفس المستوى اللى عايشة فيه! هو سعادتك مولود بكرش مليان فلوس! هو الواد اللى لسه متخرج من كام سنة ده هيبقى معاه فلوس زيك! هو اصلا هو ده الجواز! فلوس ونيش وسفرة وفرح وخمسين طقم صينى! ليه بتبوظوا الرباط الجميل اللى ربنا قال عليه بين الازواج بهطلكوا وبشوية افكار مادية ملوثه .. سيبهم يا سيدى يعافروا مع الدنيا .. هى مش حرب بين سعادتك وبين الواد .. معرفش لما يبقى عندى بنت وجالها عريس هتصرف ازاى بس اللى انا اعرفه ان اذا جاءكم من ترضون دينه وخلقه فزوجوه
ليست هناك تعليقات:
إرسال تعليق