كل واحد فينا عارف عيوبه الشكلية و النفسية كثير منيح ، عارفة إنه الشغلة الفلانية عندي قوة وعارفة إنه عندي شغلة مقابلها أنا ضعيفة فيها ، هاد الصح تكون عارف حالك وين لازم تفرمل وتوقف ، بس أنا بستغرب من العالم إلي بتشوف مثلاً واحدة عندها زيادة بالوزن وتقلها والله يا فلانة بدك رجيم و اللبس عليك مش حلو ، ع فكرة الي قاعدة بتحكيلها هاد الحكي عارفة انه جسمها مش زابط ويمكن بتبكي لما تشتري لَبْس ويمكن بتقعد تبكي قبل ما تنام عشان تقابل العالم الصبح بإبتسامة مشرقة ، مش ضروري تذكريها ، لما تكون بقعدة ويكون حد على وجهه التهاب وحبوب بتوجع أصلاً من نسمة الهوا “ أنا قبل سنتين ” وتلاقي حد يقلك يا الله ليش وجهك عليه حب ؟ صراحة شكلك مرعب ، أول الفترات الي طلع ع وجهي حب كنت ازعل و أخجل بعدها صرت أقلها مش عاجبك شكلي اقلبي وجهك حتى لو قريبة وحد بعرفه ، بعدها الكل صار يختصرني ، ودارت الأيام وغالب الي تفلسف عليّ صار عندهم خربطة هرمونات والتهابات وع أسوأ وأنا تعالجت وخلص ، لما يجي حد بكل ذكاء يقلي ، بتلبسي نضارة ؟ ليش ما بتشوفي منيح ؟ بقلها لا هاد لو قزاز مع أيطار مش نضارة ولبست النضارة عشان كنت أقرأ بالعتمة دايماً عشان اعرف اتعامل مع امثالك ، طيب انت ليش لما اكون قاعدة معك ما بتلبسي نضارة ؟ والله انا من غير نضارة ما بشوف منيح ، يعني هلأ انت مش شايفتني ؟ لأ انا أصلاً ما شايلتك من أرضك ، ولا لما حد يشوف واحدة مطلقة ، ليش تطلقت ؟ يعني الي فيها مكفيها ليش تسألي ؟ إلي صاحبة كانت تسأل صاحبة ثانية ليش تطلقت ومين بدفع مصاريف بنتها ، والمسكينة الثانية وجهها متلون من الخجل ومش عارفة شو تجاوب ، وضلت ساكتة ومنكدة طول الطريق.! انا بعرف واحدة فعلياً ما بتشوف وما بتلبس نضارة ، وشكلها اقل من عادي وعاملة حالها كلوديا شيفر ، وبتحكي عن عيوب غيرها وهي بنظري كتلة عيوب ببساطة ، الآسئلة الكثيرة انت خايف حد يسألك على فكرة وبتحاول تاخد الدفة تبعت الحديث عشان تخلص ، كلامك عن عيوب غيرك لا يعني انه انت هيك خلصت من الكلام ، انت مسكين تعامل مع عيوبك وتقبلها رح تقدر تعيش ، وانتبه على كلامك الي مثل السم عشان فيه كلام ممكن يقتل .