اية رايك انت؟

بعد ثورة يناير بكام شهر، شوفت في الزمالك أمين شرطة بيجري ورا واحد حرامي و قبض عليه في احد الشوارع الجانبيه، المهم أمين الشرطة مسك الحرامي بالعافيه لانه كان عامل زي التور و علامات الاجرام في وشه و بيقاوم و بيضرب بجنون و جه رجل صعيدي في الشارع ساعد الامين و كتفوا الحرامي . المهم لقيت ولد لطيف نزل من العمارة بتاعته و لابس الكوفيه الفلسطيني و بيزعق في امين الشرطة و بيقوله مش من حقك تمسكه من قفاه كده و ما تضربوش! امين الشرطة بص للولد بذهول و بيقوله انت بتتكلم ازاي اصلا يعني اسيبه يجري ده من دقيقة كان بيضرب فينا و عايز يهرب... فالولد قاله انت مش من حقك تقبض عليه انت مش ظابط و كمان احنا نعرف منين انه حرامي فعلا و برضه لو حرامي ما تضربوش !الامين قاله حضرتك ادري ! و بقولك ايه خليك في حالك احسن... الولد ابتدي يتعصب و بيشرح لجاره المشكله باالانجليش وكلام خطير عن ال human rights وابتدوا يقولوله فين اذن النيابه. الامين زعق فيهم قالهم نيابه ايه الساعه ١٠ بالليل ده سارق عربيه من جراج من اسبوع و مسجل خطر و بندور عليه . طبعا الحرامي كان سعيد بكلام الولد و ابتدي يقول للامين حرام عليك يا مفتري انا مش حرامي انا علي باب الله...المهم الناس ابتديت تتلم و الولد اتجنن هو و صاحبه و قرروا يخلصوا الحرامي من ايدين الامين بالعافيه و الامين ابتدي يزعق في اللاسلكي و يقول ' يا باشا تعالي فورا انا في شارع ابو الفدا و الواد هيهرب ' . المهم الناس ابتدوا يقولوا للولدين كده غلط و سيبوا الامين يشوف شغله... لكن الولدين اتعصبوا و خدوا الحرامي علي جنب و قالوله ما تخافش انا هكلملك ناس يروحوا معاك القسم . و فجأه الحرامي زق الولد ووقعه علي الارض و جري من تحت كوبري ١٥ مايو . طبعا الولدين اتصدموا و مش مصدقين اللي حصل .. و أمين الشرطة كان لسه هيجري ورا الحرامي بس غير رأيه و رجع للولدين و قالهم قسما بالله ما هسيبكم و فعلا الناس اتلموا علي الولدين و سلموهم لعربيه النجدة لما وصلت و كذا واحد قال الظابط احنا هنشهد ضدهم لانهم هربوا الحرامي . اليوم ده عرفت ان فيه فئة غبيه واخده الثورة موضه و حافظين مش فاهمين و اي هبل و خلاص عشان يعملوا نفسهم بيغيروا البلد و يتحدوا النظام لدرجه انهم مستعدين يقفوا مع اي حد ضد الشرطة و خلاص حتي لو كان حرامي..... العند و الغباء سبب كل الكوارث ال ٣ سنين اللي فاتوا.